星期二(零五年十一月二十九日)同綠太婆個孫仔去大蠔公幹。入大蠔可以由東涌搭巴士去白芒再行路入去。巴士車程只係五分鐘，不過就要成兩個幾鐘先至一班。由白芒行去大蠔灣亦只係十五分鐘，真係好鬼輕鬆。
啲人成日話東涌空氣污染嚴重係因為珠三角吹落黎。不過我地去嗰日東涌個天灰矇矇，但係去到大蠔又鬼咁清，原因又係乜呢？
唔去過真係唔知，白芒同大蠔雖然有電到，但係好多人，特別係老人家仲係燒柴，而且仲唔係執，而係斬落黎既。綠太婆個孫仔就問過當地老人家，佢地話電費貴，所以要燒柴喎。我地去到大蠔，見到一間上面有毛澤東標語既平房，不過已經變左做柴房。
綠魔幾年前去過大蠔，見到好多牛，可惜今次去已經唔見晒，而且仲成塊地生晒薇甘菊。之不過過泥灘仲好多沼潮蟹同彈塗魚，而且就喺你腳邊，真係好好睇。
出番去東涌同綠太婆個孫仔去左馬坑涌食飯，孫仔叫左個蝦炒飯加可樂，三十蚊，我就叫左菜遠牛河。哇，真係好大碟，又夠分量，你睇孫仔食蝦碌食得幾開心！
No comments:
Post a Comment